ມາເລເຊຍ ເລີ່ມບັງຄັບໃຊ້ກົດໝາຍສະບັບໃໝ່ ຫ້າມເຍົາວະຊົນທີ່ມີອາຍຸຕ່ຳກວ່າ 16 ປີ ເປີດບັນຊີໂຊຊຽວມີເດຍ ຕັ້ງແຕ່ວັນທີ 1 ມິຖຸນາ 2026 ເປັນຕົ້ນໄປ ໂດຍມີເປົ້າໝາຍເພື່ອປົກປ້ອງເດັກນ້ອຍຈາກອັນຕະລາຍໃນໂລກອອນລາຍ ເປັນຕົ້ນແມ່ນ ການກັ່ນແກ້ງທາງໄຊເບີ (Cyberbullying), ການລໍ້ລວງ ແລະ ເນື້ອຫາທີ່ບໍ່ເໝາະສົມ.
ພາຍໃຕ້ກົດໝາຍດັ່ງກ່າວ, ແພັດຟອມໂຊຊຽວມີເດຍຕ່າງໆ ຈະຕ້ອງໄດ້ຕິດຕັ້ງລະບົບກວດສອບອາຍຸຂອງຜູ້ໃຊ້ງານຢ່າງມີປະສິດທິພາບ ຫາກບໍ່ປະຕິບັດຕາມອາດຖືກດຳເນີນຄະດີ ແລະ ຖືກປັບໄໝຕາມກົດໝາຍ. ໃນຂະນະດຽວກັນ, ບັນດາຜູ້ປົກຄອງ ແລະ ຜູ້ຊ່ຽວຊານດ້ານຄວາມປອດໄພອອນລາຍຈຳນວນຫລາຍ ຕ່າງກໍໄດ້ສະແດງທັດສະນະສະໜັບສະໜູນມາດຕະການນີ້ ເນື່ອງຈາກຈະຊ່ວຍຫລຸດ ຜ່ອນຄວາມສ່ຽງທີ່ເດັກນ້ອຍຈະຕ້ອງພົບໃນໂລກດີຈີຕອນ.
ແນວໃດກໍຕາມ, ຍັງມີຂໍ້ຖົກຖຽງກັນກ່ຽວກັບປະສິດທິພາບຂອງການກວດສອບອາຍຸ ແລະ ຄວາມເປັນໄປໄດ້ທີ່ເດັກນ້ອຍບາງສ່ວນອາດຈະຊອກຫາວິທີການເພື່ອຫລີກລ່ຽງຂໍ້ຈຳກັດດັ່ງກ່າວ. ໂດຍທາງລັດຖະ ບານມາເລເຊຍ ຢືນຢັນວ່າ ຈະຕິດຕາມຜົນຂອງການບັງຄັບໃຊ້ກົດໝາຍນີ້ຢ່າງໃກ້ຊິດ ແລະ ຈະປັບປຸງມາດຕະການໃຫ້ມີຄວາມເໝາະສົມຕໍ່ໄປ.
